Newsbook Limited (newsbook.net) - 不知所謂嘅收費及服務

識我嘅人都知，我係有嗰句講嗰句，用過覺得真心好嘅嘢會拎出嚟同人分享

好多時買嘢或買service 之前都會上網做research，當然而家好多blogger 已經同media 冇分別，收錢寫鱔稿，好多時大家google 都會見到好多一面倒寫某某產品/ service 點好點好，好少會見到話有d 咩唔好，老實講，我唔相信呢個世界上會有嘢係perfect

anyways，今日唔講呢d，今次想講Newsbook Limited (newsbook.net) 呢間網頁hosting 公司，真係搞到我忍無可忍

如果你正打算使用Newsbook 嘅服務，我會勸你先用5 分鐘睇下我經歷，同埋到呢度睇堆其他人嘅經歷再考慮

事先聲明，我網店hosting 並唔係用Newsbook，我係用一位推友嘅hosting，有興趣的話請另行email 查詢

朋友最近開咗間新公司，佢請咗個assistant 幫佢，聽說當日佢係唔想咁快搞domain 嘢，一嚟佢唔識，二嚟想下一步先搞(因為現階段佢只係用email service，未搞個網住)，但係呢個assistant 係咁催逼，佢惟有聽assistant 講，交比個assistant 去搞，個assistant 選擇咗呢間Newsbook Limited

朋友同埋佢d 同事用咗大約一個月到，發現send / receive email 都極慢，呢間聲稱「寬頻和質量是全港最佳ISP網頁儲存商.現在資訊網絡更加發展成為全港五大商業互聯網供應商之一」嘅公司，收一個全文字嘅email (5mb 以內)，居然15mins 都收唔到!!!!! 有冇可能呢?

朋友終於都頂唔順，決定要轉hosting，我介紹而家我用緊嘅hosting 公司比佢，亦都幫手將佢domain + email service 由Newsbook Limited 轉去我用緊嘅hosting 公司，惡夢就由呢一刻開始...

我2/7 打電話去Newsbook 話我想拎返朋友公司domain 嘅login + password，接電話話嘅L 小姐話，個domain 擁有人係X 小姐(即朋友嘅assistant，但已離職)，叫我哋搵返X 小姐簽返份form，比返佢哋做轉名，收到form 後會email 比我，咁我哋照做，7/7 我哋send 咗份form 比Newsbook 之後，我補咗個電話去問收唔收到，Newsbook 嘅Y 小姐話收到，會盡快比domain 嘅login + password 我，但一個鐘之後，L 小姐打嚟話唔比得，因為仲有d form 未填，我完全唔明白點解仲會話有form 未填，當日係L 小姐話「搵返X 小姐簽返份form」，如果係plural 的話佢係咪應該強調要填幾多份呢?

唔緊要，我叫佢email 我填嘅form 比我，佢話我只係填咗一份比佢公司留底嘅轉domain 擁有人form，要簽返一份比Domain Registration Company，同埋一份FTP & Email Password Request密碼索取form(呢一份要收HK$300)，其實我只係想將domain 擁有人由X 小姐轉做under 朋友公司，我真心唔明點解我要填一份完全冇關係嘅FTP & Email Password Request密碼索取form 之餘又要收我HK$300，所以我哋選擇唔填呢份FTP & Email Password Request

9/7 朋友前assistant 自己交咗份比Domain Registration Company form 比Newsbook，而於10/7 早上L 小姐都email 咗login 同password 比我，我就交比我用緊嘅hosting 公司處理，hosting 公司話，呢d 做唔到轉會，佢需要transfer code，所以我再次email L 小姐同Y 小姐，要求佢哋提供transfer code

 L 小姐即刻打電話嚟，話因為我哋未填FTP & Email Password Request密碼索取form，所以比唔到我，如果我真係要，一係填form(加比錢)，佢亦都要打去問問X 小姐，先得X 小姐同意先可以做嘢

我覺得好神奇，之前要拎login + password 嘅條件係要收齊form，兩份transfer domain 擁有人嘅form 我都填好晒，理論上domain 擁有人應該已由X 小姐轉到朋友公司名下，點解仲要「問問X 小姐，先得X 小姐同意先可以做嘢」? 另外，如果我真係未交齊資料，點解Newsbook 又會喺10/7 早上比login + password 我而事後又要追我叫我交form?

另外，我想轉走個domain 去另一間hosting 公司，Newsbook L 小姐話「因為個domain 登記不足2 個月，所以唔可以轉走」，但明明個domain 係7/5 register，到當日(即10/7) 為止，已經超過60日，即係「domain 登記不足2 個月，所以唔可以轉走」根本就唔成立

我哋要求Newsbook L 小姐解釋

1. 明明已經簽晒兩份transfer domain 擁有人form，理論上應該已成功轉到去朋友公司名下，點解仲要聯絡前擁有人?
2. 我要求拎返transfer code/ authorization code，但Newsbook 一再強調我必須一定要簽多4 份form 先比我，其中FTP & Email Password Request密碼索取form 點睇根本就同我要求要嘅嘢完全冇關係，L 小姐聲稱，唔簽的話佢就要聯絡X 小姐，先得X 小姐同意先可以做嘢?如果填完呢份form 就等如改咗contact 同擁有人，點解呢份form 會叫做FTP & Email Password Request?
3. 明明朋友公司個domain 登記已過60日，點解「domain 登記不足2 個月，所以唔可以轉走」?

我email 要求Newsbook L 小姐解釋以上3 點，除咗第1同2點 L 小姐回應話因為我哋冇比錢，未填返份FTP & Email Password Request，所以喺佢公司立場嚟講係未正式轉名 (但點解又會比login  同password 我呢?)

要我哋簽多4 份form 唔係問題，問題係，我簽完之後，係咪就可以拎得返我要求嘅嘢? L 小姐話，簽晒的話14 日內會比我，我見form 上面有一行寫住加快的話+HK$200，L 小姐話加錢會快3-4 日...

而第3 點 L 小姐由始至終都比唔到個合理解釋我，對於一間自稱「寬頻和質量是全港最佳ISP網頁儲存商.現在資訊網絡更加發展成為全港五大商業互聯網供應商之一」嘅公司，provide d 咁嘅服務，下下send / receive email 要多過15 mins，職員講嘢又出爾反爾，完全唔professional 之餘亦不負責任

我真心覺得好似比人撳住嚟玩，無論喺而家公司、以前嘅公司所用嘅hosting service 都未試過咁慘，要拎返少少嘢想轉會都好似要比呢間公司玩咁，完全冇留一線嘅意思

而家大家只係等14 日呢個期限到，睇下佢哋會唔會比返d 我要求嘅嘢我，如果到期都收唔到任何消息的話我會考慮從各方面去投訴